“Ou te le’i lafoa’ia le galuega!” - Ministry Magazine Advertisement - Ministry in Motion 728x90
 

“Ou te le’i lafoa’ia le galuega!”

Login
  english / français
Tusiga / 2018 / July

 

 

“Ou te le’i lafoa’ia le galuega!”

Richard O. Stenbakken

Dick Stenbakken, EdD, a retired chaplain (colonel), United States Army, is a speaker and author residing in Loveland, Colorado, United States.

 

Ou te manatua lelei lo’u fo’i mai mai le taua i Viet Nam sa ou galue faa faifeau fitafita (FC = chaplaincy) ai i fitafita Amerika. Ina ua ma feiloai ma se uso faifeai, na fesili mai ai o ia te a’u, “O le a la le mafua’aga na e filifili e te lafoa’ia ai le galuega, ae avea oe o se FC?” Na ou tilotilo atu i ona foliga na ou iloa ai le faamaoni o lana fesili, atoa ma lona manatu: o le galue faa FC, e le se vaega o le galuega a Le Atua.

E ui la ua tele tausaga ua mavae talu ona fesili mai lea uso faifeau ia te a’u i lea fesili, ae o loo tumau pea ia ituaiga mafaufauga i talanoaga a le aufaigaluega i nei ona po. A ia mautinoa, o le avea ma FC, e tutotonu, pe a manatu i le galuega a Le Atua. O le mea moni, i le tele o siosiomaga ma faalapotopotoga, o galuega faa FC o le matagaluega lea e auai atu i nofoaga e faigata, pe le mafai foi e le faifeau o aulotu ona maua iai sona avanoa e fafagaina ai faanaunauga faaleagaga o tagata. O FC nei e atagia moni ai le galuega faia, e i latou ua avea atoatoa ma vaega o lea mafutaga, ma galue ai e talia manaoga o lea faalapotopotoga, e aunoa ma le tau aumaia o se tasi mai fafo atu o lea siosiomaga.

O le faatulagaina mo siosiomaga

Ua avea foi FC o se matagaluega e faasino tonu i manaoga o siosiomaga eseese, mai falema’i, o fale taofia, fitafita, a’oga atoa ma isi faalapotopotoga. O le galuega mo nei faalapotopotoga uma, e tai pei lava o matagaluuega iti eseese uma o le lotu —peitai e iai lona eseesega aupito mata’ina. O le FC, e faasino tonu lana galuega i tagata o lea faalapotopotoga (aufaigaluega, o e mama’i, o e taofia, o fitafita, o foma’i, atoa ma isi faalapotopotoga eseese), peitai e aofia ai i lena galuega le atoaga o lea faalapotopotoga.

E ese galuega e faia mo faalapotopotoga, ona e iai o latou lava talaaga faapitoa, o a latou tu, amioga, e oo lava ia latou gagana. E mafai foi ona faapea ane, o se faalapotopotoga, o le iunite tu tasi lea i le siosiomaga tele. O le tasi lea o mafuaaga e faigata ai ona galue iai se tagata mai fafo atu o lea faalapotopotoga. Ae o le avea ma se vaega o se faalapotopotoga e maua ai avanoa e atina’eina ai tulaga e amanaia ai; e matalatala ai foi faitotoa e molimau atu ai le feau o le faaolataga, e le mafai ona tatalaina i se e i fafo atu o lea lava li’o.

O le avea ma FC, e tele foi ina oo atu ai le molimau i taitai o lea lava siosiomaga, i auala e le lau maua i e mai fafo atu o lea siosiomaga. O se faataitaiga: i vaega’au fitafita, e faatonuina le FC ina ia fesootai ma taitai fitafita i manaoga e aafia ai amio ma uiga o fitafita uma. E le maua e le faifeau o ekalesia avanoa faapea e ofi atu ai i ia ituaiga siosiomaga; e faigata pe le mafai foi e le faifeau ona ofi atu i nofoaga faapea tusa lava pe o galulue ai tagata o lana aulotu.

E aloaia ma taliaina FC e soalaupule ma feutagai ma i latou e faia filifiliga ma faaiuga o faalapotopotoga (faalapotopotoga e iai univesete, falemai, atoa ma isi faalapotopotoga se tele faapena) e tofia iai i latou. Afai e faigaluega Fred i se fale e fausia ai masini, e tele ina le aloaia e pule fale faigaluega se faifeau e vaaia o taumafai e fesootai ia Fred, sei vagana ua faatagaina e le pule. Peitai afai e galue Jane i se falema’i, pe o Don foi i le nofoaga o fitafita, e faigofie lava ma aloia le FC i ia fesootaiga masani ai. O le tiute tonu lea e manaomia tele ai FC.

O le tiute faaleagaga

E ofoina atu e le FC sauniga ma galuega faaleagaga i tagata uma, ma iai foi nisi e filiffili e avea le FC ma a latou faifeau. E le gata ina ofoina atu, ae faatinoina foi e le FC o sauniga ma auaunaga faaleagaga, e tusa ai ma manaoga o tagata (ma faaataina ai le tele o tulaga na fesiligia ai e Iesu Keriso i latou na latou omai ia te Ia, “O le a se mea e te manaomia?”). Afai e manaomia e le pagota Buddha se manaoga faaleagaga, ona saunia lea e le FC lea sauniga, pe na te faia foi fesootaiga mo le talina o le faanaunauga o lea tagata. O se tasi lena vaega o le lu’iga/avanoa o le FC e le maua i le galuega e le faifeau o le lotu.

O le galuega a le FC, o se galuega e ausia ai manaoga e lua o le agai atu i fafo, faapea foi ma le tosina agai mai i totonu. E agai i atu i fafo le FC i nofoaga o iai tagata; e tosina mai i totonu pe valaaulia e le FC i mafutaga iti e mafanafana ma fesootai gofie ai tagata.

O le sini maualuga

Ua faateleina pea lava pea le aoaoina lelei o tagata i galuega tau FC, ona ua faatuputeleina foi manaoga mo le aoaoina ma le faatinona o lenei matagaluega mo le siosiomaga. O loo agai pea i luga faanaunauga mo lenei matagaluega a o faatuputeleina foi manaoga o faalapotopotoga eseese. I faalapotopotoga o le soifua maloloina, ua manaomia ai foi e pule, o FC e maualuluga o latou aoaoga.2 E faapena vaega’au a fitafita, e le gata o faailoga maualuluga, a ia le ititi mai i le lua tausaga talu ona galue faa faifeau.

O nei manaoga o falemai i Amerika, e fai faatatau uma nei faanaunauga mo e uma o agai atu i ia nofoaga. E manaomia e falemai FC ua aoaoina lelei, ma sauniuni e fetaiai ma tulaga eseese e feagai ma falemai i aso taitasi. Afai e leai, e mafai ona aafia lea falemai i tulaga le maalofia e faaititia ai lona aoga i tagata lautele.

E tele tomai manaomia, ituaiga tagata eseese, matata eseese

Ua faatuputeleina foi le lio o tagata eseese mai atunuu ma talitonuga eseese e fetaiai ma le FC i aso taitasi. E eseese galuega e manaomia ai tomai eseese o FC, e aofia ai asiasiga, lauga, aoaoga, faalototeleina, ma le tele o isi tiute eseese talafeagai, atoa foi ma nisi manaoga le maalofia. E manaomia e le FC o vaega’au fitafita le malosi ia tutusa pei o fitafita, ma ia sauniuni e siitia faatasi ma fitafita pe sau se valaau faafuasei e auauna i soo se nofoaga pe o se isi atunuu. E ono tete’a ai le FC mai lona aiga mo se taimi umi lava, a o fesagai ma tulaga e lamatia ai le soifua (atoa foi ma avanoa e molimau atu ai) i taimi o taua.

E matua aloaia ma manaomia tamaitai i le matagaluega faa FC, ona latou te aumaia i totonu o le galuega vaaiga e ese mai tulaga masani ai alii. Ua maualuluga tulaga ua auauna faa FC ai tamaitai i vaega’au FitaFita, atoa ma le vaega o Vaalele Tau a Amerika.

O se tasi o tulaga manino e taua tele i la’u galuega faa FC, o lo matou galulue vavalalata lea ma i latou e eseese talitonuga, aga ma tu ma atunuu e o mai ai, e aunoa ma le afaina ai o lo’u lava tapulaa ma talitonuga. O se tulaga taua lenei o le faaauaauina ma aoaoina pea, o lo matou galulue faatasi ma i latou e eseese o matou talitonuga, ae matou te faia ma le faamaoni ma le fiafia o tiute eseese mo lea faalapotopotoga.

E anoanoai tala e faamaonia ai le manaomia tele o lenei auaunaga o le FC. Na maua e se tasi tamaitai na manaomia se fesoasoani, se malamalamaaga atoa ma se saolotoga mai se tulaga na pologa ma mafatia ai i lona olaga atoa. Sa iai o ia atoa ma lona alii a o ia faapea mai, “Faafetai i Le Atua! Ua 30 tausaga o o’u faatali i lenei saolotoga; a o lenei ua mafo’e atu o’u mafatiaga.” Na matua leai se manatu o lona toalua i le loloto o le mafatia sa fesagai ma lenei tamaitai ae la te lei faaipoipo. Pau lona iloa, o iai se faafitauli na mafua ai ona la o mai e saili se fesoasoani.

Sa iai foi se alii satini na fesagai ma faafitauli e tele ma lona toalua. Na oo lava ina folafola iai e ona soa fitafita le oti ia te ia. Na faaaogaina e lenei satini le fana ma tafana ai le fola ma le faitotoa o lava fale faatoa valaau mai ai i le FC mo se fesoasoani. Ou te taunuu atu o uu le fana i le tasi lima, a o le fagu uisiki i le isi. Na faaata mai e lenei alii le fana ia te a’u ma fai mai e tapuni le faitotoa i o’u tua. Sa umi se taimi o ma fesagai ma lenei alii satini, faatoa to’a ifo ai o ia ma vave loa ona ma sailia le fesoasoani manaomia mo sia tagata mafatia, ae na te le’i faaooina se leaga i se tasi tagata, pe o ia foi lava.

E iai foi taimi fiafia. Pei o se tamaitai Iutaia sa faatumulia i le mafatia ma le tiga ona sa le mafai ona maua i se ma’itaga, a o lona aiga, o le avea ma matua, o le tumutumuga lea o le olioli. Na sau o ia i le FC Kerisiano e tatalo ma ni fautuaga mo ia. Sa ma tatalo ma vaavaai foi i se molimau mai le Tusi Paia ma sia tamaitai, ma ia mafai ai ona faasoa ona lagona i Le Atua. I ni nai masina, ae taliu mai ma le tala fiafia ua la faatalitali nei ma lona toalua. E lei leva ae toe taliu mai lea tamaitai ma le pepe fou, ma fesili mai mo se tatalo faafetai, atoa ma se faamanuiaga mo ia, lona toalua, ae maise le pepe fou.

O se avanoa taua le avea ma FC. E mafai ona avea o se avanoa mata’utia, ma ono lamatia ai foi le soifua. Peitai, e iai foi taimi e faatumulia ai i le fiafia ma le olioli, ae leai se taimi e samasamanoa ai ona o le galuega faa FC, o se galuega e atinaeina ai tulaga e suia ai olaga o tagata e toatele. E faaataina e le galuega a le FC avanoa ma tulaga o le galuega e aapa atu i fafo na faia e Iesu Keriso: Na Ia faatasi atu i nofoaga o iai manaoga o tagata, fesoasoani ia mafai ona foia, tutupu, ma atinaeina ai mafutaga loloto ma Le Atua. O le tali atu la i le fesili a le uso a faifeau ia te a’u, o le avea ma FC, e le o se lafoa’ia lea o le galuega a Le Atua. A o lona tuufaafeagai, ona na ou maua ai le avanoa na ou faia ai galuega eseese mo Le Atua sa ou le manatu, pe na faia muamua i lo’u olaga.

E valaau uma ea e fai ma FC? Leai. A “o a’u nei ma lo’u aiga,” o se valaau e faagaeetia loto, e malie, o se matagaluega e lu’ia ai le agaga a o tatalaina mai ai avanoa eseese. O le FC, o se valaau; o se matagaluega e faatumuliia i avanoa uiga eseese e le nisi mattagaluega e maua ai. O se matagaluega foi e matua manaomia ai le tatalo. E talafeagai ea mo soo se tasi? Leai. O se vaega ea o le galuega a Le Atua le FC? Ioe!

O le Tala ia Maria

Tusia e Dick Stenbakken

I le taimi o le taua i Viet Nam, i le isi itu o le lalolagi, na ou alu ai i lo’u ofisa i le po mo galuega faa FC. A o o’u ulufale atu i totonu o le potu pogisa, na ou matua te’i ma atuatuvale, ona sa ou lagonaina, “O loo iai se tagata i lo’u potu.” O se mea matautia lea i soo se nofoaga e tupu ai se tulaga faapea. A e manatua o le nofoaga lenei o le taua! I lena lava fasi sekone e miliona manatu na feosofi a’e uma i lo’u mafaufau: Taliu ma momo’e! ‘Alo! Solomuli lemu i fafo! ‘Aua e te migoi! Ki moli! Faatali i lou oti! Ia manatua, e le feoa’i FC ma ni aupega. E le gata o lo’u lava lea talitonuga, ae faapena foi ma tulafono faamaumauina e malo o le lalolagi mo FC i taimi o taua.

Na ou tautagotago lemu atu e sa’ili le ki o le moli. A o faatumulia le potu atoa i le malamalama, na ou vaaia se tagata o faapupuu mai i le tulimanu o le potu. O pulato’a mai ona mata ia te a’u, a o foliga na vaaia ai le matua fefe tele—o se tasi o fiatfita o la matou vaega’au. A o le’i matala atu sa’u tala, ae na muamua fai mai o ia ia te a’u ma le leo gatete tele, “Na ou vaai nei i le tevolo!”

“Ae faafetai i Le Atua o oe, FC. Na ou vaai i le tevolo i le po nei! Ona ou faananati mai ai lea i lou ofisa.” A o faamatala mai e lenei fitafita le la feiloaiga ma le tevolo, na ou vaaia le gatete atoa o lona tino. Na mumu atoa ona mata, ma foliga mai ai na matautia tele le la feiloaiga ma le tevolo. Na le mapu le luelue atoa lona tino i le fefe tele.

“Ua lelei ua e sau,” na ou fai atu lemu ai i lenei alii, ma lona leiloa lo’u foi le mautonu. “E te saogalemu iinei. Se’i faamatala mai le mea na tupu.”

E sili atu i le itula atoa o faamatala mai e Marty le tala: O ona mafatiaga, o lu’iga, o mata’u, atoa ma ona moomooga uma. A o amata ona to’a ifo Marty, na ou fesili atu loa iai pe mana’o ma te tatalo. “Faamolemole! Ou te matua manaomia lava se tatalo,” o lana tali naunauta’i mai lea ia te a’u.

Ina ua mae’a le ma tatalo, na ou vaaia le to’a filemu ane o Marty. Ona fesili mai loa lea o Marty ia te a’u, “CF, e iai sau Tusi Paia ma a’u? Ua ou lagona lo’u manaomia ona ou faitauina o le Tusi Paia e faatonutonuina ai lo’u olaga.”

Na ou tuuina ia Marty le Tusi Paia, “Faafetai tele FC! O le a ou faaaluina le taimi e faitau ai le Tusi Paia! Faafetai tele foi mo lou taimi. Faamalie atu foi i le faate’ia o oe i lo’u ulufale i lou ofisa e aunoa ma lo’u valaau atu ia te oe.

Na ou faailoa atu lo’u fiafia a o ma faamavae ma Marty, “E moni, ae atonu e tele atu nisi tulaga ta te matua taufai maofa uma ai e le’i faailoa mai e Le Atua ia i ta’ua.”

O le aso na sosoo ai na auai mai Marty i le lotu. Na faaali mai e Marty le Tusi Paia ma ona foliga fiafia tele. Na faailoa mai e nisi o la matou ofisa uiga maoa’e o o lenei alii o Marty na iai muamua. O se fitafita e vave tele le ita, ma e fiafia tele foi i le inu ‘ava. Sa iai foi le manatu sa na ia faaaogaina fualaau oona faasaina. Sa faigofie ona maua ia ituaiga o fualaau, ae maise foi le faaaogaina o le mariuana ma fualaau oona taugofie tele na faaaaogaina e fitafita e tau faafilemu ai lagona mafatia ona o tulaga o le taua. Ou te le o manino pe na vaai moni Marty i le temoni, pe o aafiaga o ia fualaau? Pau le mea taua, na sailia e Mary lona FC, ma i’u ai ina foi ma lana Tusi Paia i ona lima.

E lei leva nai aaso ae momoe mai Marty ia te a’u ma valaau mai, “FC! Ou te manaomia se isi Tusi Paia!” ona faananati ai lea o ia ma se tasi foi Tusi Paia, a o valaau mai, “Faafetai, CF!”

Mavae atu foi nai isi aso, ae toe momoe mai foi Marty ma toe fesili mai foi mo se isi foi Tusi Paia. Ona ou amata loa lea ona ou manatunatu, Atonu ua faateleina faafitauli o Marty? Atonu foi ua galo ia te ia le Tusi Paia na ou muai tuuina iai? A o le tulaga na paso ai lo’u mafaufau, o taimi uma lava e fesili mai Marty i se Tusi Paia, e faia lava ma le fiafia ma le naunautai tele. Ae le gata foi i lea, ua oo mai molimau mai i lana vaega’au i le fiafia tele o Marty e feutagai ma galulue faatsi ma ona taitai uma nai lo le taimi muamua.

Tusa ma le vaiaso talu le ma fetauiga ma Marty mulimuli, ae fai mai se tasi fitafita o le vaega’au a Marty, “CF, o le a le mea ua tupu ia Marty?”

E tele tali o fesili faapea i nofoaga o le taua, a o le tele o ia tali, e le ni tali e lelei pe fiafia ai foi se tasi.

“O le a le uiga o lau fesili?” Na ou toe fesili ai i le na fesiligia a’u

“Cf, e te iloa, o Marty, o se tasi lea o fitafita e leoina tua’oi.”

Ua atili ai lo’u popole i le faamatalaga a lenei alii. O fitafita leo tua’oi, e tele lava ina muamua lavevea pe feoti foi pe a osofaia e le fili nofoaga o vaega’au a fitafita.

Na lulu le ulu o lenei alii ma toe faapea mai, “Sa avea Marty ma se tasi o fitafita e faatupuina fusuaga, inuga ‘ava, atoa foi ma le faaaogaina o fualaau faasaina i la matou vaega’au. Ua amata nei ona faapopoleina i matou uma i lenei tulaga fou ua matou faalogo iai. Na ou vaai o lua talanoa, ma ou fia malamalama ai pe o le a le mafuaaga tonu o lenei suiga fou ua oo iai Marty.”

A o lei fai atu sa’u tala, a ua toe faapea mai le tala a lenei fitafita talavou, “A o fesuiai le leoleoga ananafai, ae masau mai Marty ma amo mai lana aupega—ma le Tusi Paia i lona lima. E seasea ona vaaia Marty o toe aunoa ma lana Tusi Paia.”

“Ona a lea?” na ou fesili faananati atu ai.

“Ona valaau atu lea o le tasi fitafita ia Marty, ‘Hey! Marty! O oe se faifeau? E te fealuai lava ma lena Tusi Paia i taimi uma!’ ”

“E le’i toe faatali Marty,” sa faaauau mai ai le tala a lenei fitafita talavou, “Na faafuasei ona liliu faa fitafita Marty i lona itu tauagavale, agai atu i le na valaau ane ia te ia, uu le kola, soso’a atu lana Tusi Paia i foliga o le valaau ia Marty ma fai atu iai, ‘Faalogo lelei mai oe. Tago i le Tusi Paia lea ma alu faitau iai. A e le faia lea, ona ou toe fesuiaia lea o ou foliga i le isi taimi tat te feiloai ai! Ua e faalogo mai?’”

“E fai lava lana tala,” o le molimau lea a le fitafita talavou, “ma na ia tuu mai foi ia te a’u le Tusi Paia lenei. FC, ua matua sui lava Marty. Ua le toe inu ‘ava, o se fitafita ua matua sui lava.”

Na o le pau la’u tali, o le mata ataata i si fitafita talavou lenei. O lea faatoa ou malamalama i le mafuaaga e fesili soo mai ai Marrty i ni Tusi Paia. E ui ou te auai i lana auala, na matua manino i matou vaega’au atoa, e iai se mea ese ua tupu ia Marty ua mafua ai ona suia atoa lana amio. Ua sui lana faataulaiga. Ua mana’o foi Marty ia suia faatasi ai ma olaga o lana vaega’au. Na amata lea suiga i le po na ma feiloai ai i lo’u potu pogisa, e leai se isi o i ma’ua na mafai ona iloa muamua. E ui e le se feiloaiga fuafuaina, peitai na iai le taitaiga mai le Lagi—ma ou matua olioli ai i lena avanoa.

Ou te le fesuia’ia ni olaga; e na o Le Atua Na te faia lea suiga. Ae manino le faaaogaina e Le Atua o lo’u tagata e ala atu ai se suiga maoa’e ia Marty. O le faa faifeau fitafita (FC) lena. 

Advertisement - RevivalandReformation 300x250

Ministry reserves the right to approve, disapprove, and delete comments at our discretion and will not be able to respond to inquiries about these comments. Please ensure that your words are respectful, courteous, and relevant.

comments powered by Disqus

 

back to top